مكياج بسعر رخيص ودايما ارجع اخذه

مساء الخير ياحلوات 

اشتتتتقت اشتتتتقت اكتب بالمدينه ، وحبيت ارجع اكتب فيها لان تبقى مرجع للابد🤍🤍

كلنا نحب منتجات الدرق ستور ودايما نحب البديل بذات ف اللي نستخدمه يومي ، دايما مو كل غالي يعني حلو وكل رخيص يعني مو حلو ياااكثر ماجربت ميك اب غالي ومايسوى للاسف:( ، وكم جربت منتجات رخيصه جدا وادمن عليها ، فحبيت اليوم اكتب لكم عن اللي احبهم وادمنت عليهم ، واخذتهم اكثر من مره 👀

كونسيلر ميبلين فيت مي 

أممهم مادري لي كم سنه مزعجتكم فيه...؟ بس يستاهل ان احكي فيه ليل ونهار . 

يذكرني كثير كونسيلر نارس ، انا هالاتي قويه ف مو اي كونسيلر يعطيني النتيجه اللي ابيها احب اغطي هالاتي بس بالمقابل احب يبين طبيعي .. اول شي احط كونسيلر اغمق مني مثل ميبلين درجه 40(بديل كرامل من نارس) شوي بس وبالطبطبه وبعدها كونسيلر من لوني طبقه محترمه شوي 😅 واستنى عليه شوي(اذا دمجتيه بسرعه مراح يعجبك ) ف استنى كم ثانيه بس بعدها ابدا اطبطب بشكل خفيف ولاتكثرين طبطبه بتشيلينه 😒 ويغطي لي هالاتي ولايقلب معاي ابدا واهم شي يبقى ثابت ل اخر اليوم...طبعا نثبته بلوس بودر 

مادري كم علبه خلصت بس كثير كثير كثير ... تقدرون تاخدونه من اي مكان فيه ستاند ميبلين او اون لاين فرق السعر طبعا🚶🏻‍♀️

واون لاين موجود بكل موقع اي هيرب ارخص بكثير من عندنا 

وهذا كود خصم ايهرب QAL1309

طبعا من جربت الكونسيلر صار فيني فضول اجرب باقي مجموعه فيت مي 

جربت هالفانديشون .. متخيلين جلست سنه كامله ماستخدم غيره 👀 بس بالنهايه طفشت وقلت اجرب غيره😂 

انا بشرتي مختلطه وماحب الفل كفر ابدا..ولااحب الخفيف احب الوسط اللي يغطي ويبين طبيعي ومايتعبني بالدمج ، وهذا كذا تغطيته وسط ويندمج معاي بسرعه ، وابدا مايتاكسد معاي(اهم شي تختارين الدرجه الصح) ، ولايدهن ببشرتي ولايبين لها قشور ..انا طلبته اون لاين ف خذيت اغمق من الكونسيلر<<اانا احب الفاونديشون اغمق مني بدرجه احس يطلع احلى🌚 (كونسيلر استخدمه دجه ٢٥ و ٢٠ ف الفاونديشون ماخذه ١٢٨) اختي وبنات خالاتي ادمنو عليه معاي🌚  اللي بشرتها دهنيه مراح يناسبها 

موجود بكل مكان فيه استاند ميبلين مثل وايتس وبوتس وسنتر بوينت

كونسيلر ميبلين هذا بعد طفشتكم فيه🌚🤍 

كنت استخدمه لما اداوم الصباح احب اغطي هالاتي بكونسيلر يغطي لي ومايكون اوفر لصباح ويبين طبيعي ف طبعا هذا الخيار حقي  🌚🌚🤍 ، تغطيته مو قويه بس احط قبله كونسيلر اغمق مني عشان عندي هالاتي (عشان مايقلب رمادي) بعدها احطه واثبته بلوس بودر يبين طبييييعي جدااا لدرجه احطه بدون فاونديشون ويغطي لي هالاتي ولايتاكسد معاي ولايخطط ابدا .. فعلا احبه🤍🤍🤍 

موجود بكل مكان فيه ميبلين وب ايهرب بسعر افضل وارخص

وهذا كود بيخصم لكم زياده بعد🌚🤍 

وهذا كود خصم ايهرب QAL1309

هالبراند شفتها بالصدفه ان تو جديده قلت اخذ كذا منتج اجربه وكلهم خلصتهم بس مارجعت اخدهم الاهالبودر ، اول شي البراند تركيه تبع فلورمار ، انا ماحب البودر اللي فيه تغطيه ترا احس تغث ع البشره😅 ، هالبودر خفيفه ع البشره وابدا ماتكتل ولاتعطيني احساس فيه طبقه ع بشرتي ، ولاتغير لي من الفاونديشون ( ومكتوب عليها مات وترا ماهي بمات)🌚 بس احبها ان تثبت لي الفاونديشون ولاتحوسه لي ...واحب البودر اللي كذا ماابي منها اكثر من كذا🌚 وحبيتها ورجعت اخذها لان سعرها مرررره حلوه ٣٩ ريال بس 👀 جربت ماركات كثير واحبهم ويعطوني هالنتيجه اللي احبها بس دام ذي زيهم واقل من نص سعرهم ياسلام 🤍🤍🤍🌚

تحصلونها بسنتر بوينت 

بودرة حواجب فلورمار

بالنسبه لي ايلامسكا مافيه زيها ابدا.. بس لان صرت ماحصلها ابدا🥺 فصرت اجرب واعجبتني فلورمار اللون غننني يطلع زي ماهو وثابته ماتتحرك وكميتها كبيره اطول عندي ، بس فيها عيب وحيد بسرعه تنكسر من اي صقعه خفيفه تتكسر💔 تكسرو عندي ٣ ، بس ارجع اخذها لانها حلوه وسعرها بطل ٣٩ بمحلهم

وبتدوينات الجايه باذن الله بحط لكم باقي  المنتجات ماحبيت اطول التدوينه 👀🤍